ዱካን ተበርህ

Free book sample

Chapter 1

1 -1- ወዲ-ሰብ ምግራም እንድሕሪ ኣጥፊኡስ ኣኺሉዎ እየ ዝብል፤ ካን ኣኺሉዎ መቓብር ጥራሕ ኢዩ ዝጽበዮ። ንግሆ፣ ገና ከይወግሐ፣ ገና ጸሓይ ሰይፈ-ጩራታታ ከይዓጠቐት፣ መሓውራት ጸሓይ ንዂናት ባናታት ሎሚስ ብዳርባዶ ብወጥሪ መንትግ ክንውርውሮም ኢሎም እናወስወሱ፣ ባዕጊጉ ከንባሁቕ ዝጀመረ ምብራቓዊ ኣድማስ ሃሳስ ገጹ እናሓበሰ፣ ኣዕዋፍ ብርሃን ዘይኣመሉ ደንጉዩ ከይበላ፣ ርቡጽ ክኵናይ ድማ መሰለይ ደንጒዩኒ ኢሉ ብንግሆኡ ከየንጸርጸረ፣ ቀቐውቲ ደራሁ ቃንአን ቀይረን ቆይቊ ከየብዝሓ፤ ኮታ ዝዀነ ፍጥረት፣ ሰብ ይኹን ዑፍ፣ ብንግሆኡ ብኹራ ክቡከር ባህ ኣይብለንን። ናይ ንግሆ ፍሽኽታ ዝመስሉዎ የለን። ኣየ’ባ ከምሕረሉ ንወዲ-ሰብ ሰሓቕ። ዋላ ንጎቦታት፣ ንጫፍ ኣግራብ፣ ንመዓሙቕ ስንጭሮታት ይኹን ንዝባን ሜዳታት፣ ንዅሎም ናይ ንግሆ ክምስታ ኢዩ ግርማኦም። ጸሓይስ እንታይ ድያ? ዘይ ዓባይ ፍሽኽታ ኢያ ንርእሳ። ካልእ እንታይ ኣሎዋ! ብኽምስታ ጀሚራ ናብ ፍሽኽታ፣ ጸኒሓ ናብ ሰሓቕ፣ ናብ ካዕካዕታ፣ ናብ ዓውታ፣ ናብ ዋዕዋዕታ። እንታይ ኣሎዋ ጸሓይ ዘይ ምቖት፣ ዘይ ሓይሊ፣ ዘይ ሓቂ! ዘይ ፍቕሪ! እንታይ ኣሎዋ ጸሓይ ዘይ ጸወታ፣ ዘይ ልግሲ! ንዓና’ሞ ከኣ ጕንዖ ኣሎዋ ኢዩ ዝብሃል፤ ምሳና ፍሉይን ጥቡቕን ዝዀነ ኣጠማምታ ከም ዘሎዋ’ሞ ምሉእ ዓዲ ምመስከረ። ኩራ ጽልኡለይ መባልዕተይ ኣይኰነን፤ ብንግሆኡ ምኒን ዝብሉ ኣይፈቱን፤ ቀልጢፎም ገጾም ዝጽውጉ የፈንፍኑኒ። ወረ ሓሬት ፍርሒ ገጾም ስግድግድ ኣቢሉ ተምላስ ኢዩ ዘምጽኣለይ። ገለ ከይኰኑ ብኽያት ወይ ኣውያት ዘስምዑ ዋላ ኣይቀድዉንን። ኣነ ሰሓቕ እየ ዝፈቱ፤ ካዕካዕ ዝብል ምድረ-ሰማይ ይብርሀኒ፤ ምናዳ- ምናዳ ንግሆ እንታይ ኢዩ ብኽያት፤ እንታይ ኢዩ ኮርፈፍ ምባል? ሰኣን ምጥማት ንምብራቕ? ሰኣን ምስትብሃል ሕዝሎ ብርሃን ኣብ 2 እንግድዓ ጎቦታት? ደርፊ ባሕሪ ከየቕነውነውካ! ምኽሪ ጎቦታት ከይሰማዕካ! ኣብ ጸልማት ፍልጠት ዝመስል ድንቁርና ተሸጒጥካ ምስቁንቋን ኢልካ ዘረባ ባህ ኣይብለንን። ናይ ብሓቂ መዓንጣ እንተ’ልዩካ፣ ነቲ ዘይተገበረ ጸድፊ እሞ ጠምቶ፣ ንዓይ ከኣ ኣብዚ ከዕርፍ ግደፈኒ... ትብል ዘላ እያ ትመስለኒ ኣዛሚት። ብርግጽ ብቓላት እንተ ዘይበለቶ ብሕልና ከምኡ ኢያ ትብል። ካልእ ክትብል ሰሚዐያ ኣይፈልጥን። ደቂስና እንከሎና እኮ ኢዩ እዚ ኩሉ ትብለኒ ዘላ መሲሉ ዝስምዓኒ፣ እምበር ገናኮ ካብ ዓራት ኣይወረድናን። ኵሉ ግብራ ዝዀነ ኣኪበ እንተ መርሚረዮ ግን ኣፋ ከይከፈተት ብጠባያ ትገልጾ ዘላ ዘረባ ኢዩ። ኣዛሚት ኣምላኺት ብርሃን ኢያ። ካብ ኣዒንታ ጩራታት ብርሃን ናብ ልቢ ሰብ ክውርወሩ እንከሎዉ ይርኣዩኒ። ገጻ ድማ ከም ዘሎዎ ምልክት ብርሃን ኢዩ። ነቲ ኣብ ጸሓይ ዝተመስረተ ጥንታዊ እምነት ኤርትራ’ያ ተዘኻኽረኒ። ሊቃውንቲ ታሪኽ ካብ ሽዑ ዝጥዕም ህይወት ኣይተራእየን ኢዮም ዝብሉ። እቲ እምነት ከመይ’ሉ ሃሲሱ ከም ዝበረሰ ገና ክምርመር’ዩ ዝብሃል። ኣብ ናይ ኣእማን ሓውልትታትን ቅርጽታትን ግን ምስሊ ጸሓይ ከም ምልክት ተኸቲሙ ክሳዕ ሕጂ ይርከብ ኣሎ። ኣብቲ ሰፊሕ ገጽ ኣእማን ምስ ወቐሩዎ ከም ስምብር ነዲሩ ኢዩ ምልክት ሰተታ ጸሓይ ዘንጸባርቕ ዘሎ። ልዕሊ ሲሶ ክቢ ቃለቤት ወርሒ ድማ ኣብ ትሕቲ ሰተታ ጸሓይ ከም ሕበጥ ተነፊሓ ትርአ። ነቲ ናይ ብርሃን ኣምላኽ ንምጽልማት ካብ ጥንቲ ክሳዕ ሕጂ ይፍተን ኣሎ። ኣብ ውሽጢ ህዝቢ ዘሎ ድጉል ብርሃን ግን ከም ዘይሃልኽ ረመጽ ኰይኑ ስለ ዝቕጽል ናብ ሃልሃልታን ባርዕን እውን ክቕየር ይኽእል። ወርሒ ግን ምልክት ሰብ ኢዮም ዝብሉዋ። ነቲ ነናሻዕ ዝቀያየር ባህሪ ሰብ ተንጸባርቕ ይብሉ። ብዛዕባ ኣዛሚት ንምቕጻል ግን ብርሃን ሓደ ጥራሕ ክውንኖ ከም ዘይክእል ርዱእ ኢዩ። መቐመጥ ብርሃን ዝብሃል የለን፤ መንጸባረቒ፣ መንጠሪ፣ መዝለሊ ብርሃን ግን ኣይሰኣንን ኢዩ። ንብርሃን ኣብ ሳንዱቕ ክቑልፉ ዝኽእሉ ዝመስሎም ሰባት ዓያሹ ኢዮም። ኣዛሚት ንበይኑ ክውንን ዝሓስብ እንተልዩ ከኣ ብርሃን ጸሓይ ንበይኑ ዝምነ ሰብ ክኸውን ኣሎዎ። እቶም ዓበይቲ ኣእሙሮን ልቢን ዘሎዎም ኣይውነኑ፣ ኣይውንኑ ኢዮም። መቐመጥ ዕብየቶም የለን፤ መንጸባረቒ ፍቕሮም ጥራሕ ኢዩ ክርከብ ዝክኣል። 3 ብዛዕባ ንግሆ ምትንሳእ እንተ ተላዒሉ ኣዛሚት ትተንስኣዮ ዘይብል ፈላጢ የለን። ድቃስ ጸጊባ ኢያ ትትንስእ። ንዓራት ኣይትእውዶን፣ ንሱ’ውን ኣይእውዳን። ምስ ህይወት’ውን ከምኡ ኢያ፤ ኣይት…