ከንፈር ሄርሜላ

Free book sample

Reading section 1

[1] ከንፈር ፍቕራዊት ልቢ ወለድ ዛንታ ሄርሜላ * ‘ኣሜሪካውያን ንኣንጀሊና ጆሊ ዘድንቁ፡ ንኤርትራዊት ሄርሜላ ስለዘይርኣዩ እዮም!’ ‘ኮኾብ PRISON BREAK ማይክል ስኮፊልድ፡ ቕዳሕ ኢዮብ’ዩ!’ * ‘ንሞናሊዛ ዝቐብአ ሌናርዶ ዳቪንቺ፡ ፈጣሪ ንሄርሜላ ከም ዝሰርሐ ክፈልጥ ኣለዎ!’ ‘ኢዮብ ናይ ፍቕሪ ኣርሰን ቨንገር’ዩ!’ [2] ‘ምናልባት እዚኣ እታ ንትሮይን ስፓርታን ዘናቖተት ሄለን ክትከውን ኣለዋ!’ ብኣልጌና -ወልደማርያም መእተዊ ክቡር ኣንባቢ፡ እዛ ከተንብባ ትዳሎ ዘለኻ መጽሓፍ፡ ኣብ ማሕበራዊ ህይወትን ጾታዊ ፍቕርን ዝያዳ እተተኲር ልበ-ወለዳዊት መጽሓፍ’ያ። ንፍቕርን ጓል ኣንስተይትን ከም ኣቕሓ ብገንዘብ ክትዕድጎም ምፍታን፡ ብዘየለ ቓላት ነብስኻ ከተቖናጁ ምፍታንን ዓስቡን፡ ዘይበሰለ ህዉኽ ውሳኔታት ዘስዕቦ ሓደጋን መዘዙን፡ ናይ ቐልዲ ፍቕሪ ኣንፈቱ ስሒቱ ሓቐኛ ስምዒት ክፈጥር፡ ህይወት ሃብታማት ዝጎዩላ ድኻታት ዝዕዘቡላን መድረኽ ጌርካ ምሕሳብን ጸገማቱን፡ ኲናት ውሽጢ ንደገ ወጽዩ ርእሱ ዝኸኣለ ሳዕቤን እንከኸትል፡ ተበዳሊ ሕነኡ ክፈዲ ሃነፍነፍ ክብል ዝግድዶ ጠንቒን ውጽኢቱን፡ ኣብ ልቢ ሰባት ክፍኣት ዘሪእካ ሓጥያት ከተቡቚል ምፍታን ዝህቦ ጻማ፡ ፍቕሪ ገንዘብ ንሕልና ኣዕዊሩ ኣራዊት ክልወጥ ከም ዝኽእል ዝገሃደሉ ተርእዮ፡ ሕልሚ ሰባት በቲንካ ውልቓዊ ረብሓኻ ክትሃንጽ ምፍታን ዝህቦ ውጽኢት፡ ንሓቐኛ ፍቕሪ ዝግባእ መስዋእትን ትብዓትን፡ ኣብ ዝብሉ ዝተፈላለዩ ዛዕባታት ኣቶኲራ ዘላ መጽሓፍ’ያ። ክቡር ኣንባቢ፡ ሰላም ሰባት ዘሪግካ፡ ሰላምካ ምውሓስ ምጽዓር ልቦና’ዶ ዕሽነት? ገንዘብ ወረቐት ክንሱ፡ ከም ፈጣሪ ኣምለኽቲን ሰዓብትን ከጥሪ ዝኸኣለሉ መኽንያት እንታይ’ዩ? ብዋጋ ሰባት ዝዕደግ ክብሪ ዕድመ ክህልዎ ድዩ? ዓይኒ ሕልናኻ ዓሚትካ ዓይንኻ ቛሕ [3] ምባል፡ ካብ ዓይነ ስዉር በየናይ መለክዒ የፍልየካ? ናይ ዝብሉ ኣገደስቲ ሕቶታት መልሲ ኣብዛ መጽሓፍ ኣሎ። ክቡር ኣንባቢ፡ ካብ’ታ ኣብ 2014 ዘሕተምክዋ ‘ምጾታት ፍቕሪ!’ ዘርእስታ ቦኽሪ መጽሓፈይ፡ ብዙሕ ከም ዝተመሃርኩ እምነት ኣሎኒ። ኣብ ስርሓተይ ተኣማንነት ከሕድርን፡ ንዝበለጸ ስራሕ ክጽዕርን፡ ቐዳመይቲ መጽሓፈይ ልዑል ኣበርክቶ ነይርዋ። እዛ ናብ ኣንበብቲ በቒዓ ዘላ ካልአይቲ መጽሓፈይ ከኣ፡ ነቶም ካልእ መጽሓፍ ንክሰርሕ ዘበጋገሱንን ዘበራቱዕንን ደገፍተይ ህያብ ትኹነለይ። ክቡር ኣንባቢ፡ ኣብ መወዳእታ ብመንገዲ ንባብ ናብ መጽሓፈይ ክትገይሽን፡ ዑደት ክትገብርን ብኽብሪ ይዕድመካ። ምስ’ዚ ፈጢረዮ ዘለኹ ልቢ ወለድ ግን ከኣ ካብ ክውንነት ዘይርሓቐ ዛንታይ ተላለ። ትሕዞ ሒዝካ ብጽሓኒ ከይመስል ዘረባይ። ኣንብበኒ’ሞ፡ ንባብካ ከኣ ንገረኒ። ንዝህልወካ ርእይቶ ብሃንቐውታ ከም ዝጽበ፡ ጌና ንባብ ኣብ ምጅማርካ ከፍልጠካ እደሊ። ሰናይ ንባብ! ደራሲ- ኣልጌና ወልደማርያም ቚ.ስልኪ -07486152 ምስጋና! ብሓፈሻ ንኩሎም እቶም እዛ ስራሕ ኣብ መፈጸምታ ንኽትበጽሕ ዝተሓባበሩኒ ውልቐ ሰባትን ትካላትን፡ ልባዊ ምስጋናይ የቕርበሎም። ገለ ካብኦም ንምጥቓስ ከኣ፡ ብኮምፒተር ንዝጸሓፋለይ ኤደን ዓንደን ልዋም ኣስገዶምን፡ ናይ ገበር ኣርትዖት [4] 1 1.A. ‘ንክምስታ ስኒት ከም መደንዘዚ ተጠቒምካ፡ ንኣወዳት መጥባሕቲ ከተካይደሎም እከኣል’ዩ! ’ [5] ካብታ ዝተሳፈረላ ኣውቶቡስ ምስ ወረደ፡ ልዕሊ ንቡር ክፈጥን ተራእየ። ናብ ዝተመደቦ ቦታ ስራሕ ክበጽሕ’ዩ ዝህንደድ ነይሩ። ካብ ኮሌጅ ምስ ተመረቐ ብኣልጒሎት ከም መምህር ኮይኑ’ዩ ዝሰርሕ። ጌና ኣብ ዝምህረሉ ቦታ ስለዘይበጽሐ፡ ካብተን ኣብ ብሎኮ ዝነበራ ምኒባሳት ክሳፈር ነይርዎ። እተን ሚኒባሳት ተተበጊሰን ኣመና ቁልጡፋት ሙዃነን እኣምን’ዩ። እቲ ጸገም ክሳብ ዝመልኣ ዝወስድኦ ግዜ’ዩ። ዕድል ገይሩ ንኽትመልእ ሓደ ሰብ ጥራይ ዝተረፋ ሚኒባስ ክረክብ ተሃንጠየ። ዕድል ኣይገበረን። ተረኛ ሚኒባስ ካብ ሓሙሽተ ዘይሓልፉ ሰባት ጥራይ’ያ ጽዒና ጸኒሓቶ። ምስ ክቱር ሕርቓኑ ድማ ብቕድሚት ቦታ ስለዝረኸበ ተሳፈረ። ክንደይ ዝኣክል ግዜ ክጽበ ከምዝኾነ ከይፈለጠ፡ ብውሽጡ ተረበሸ። ነታ ሚኒባስ ዝመልኡ ተማሃሮ ቀልጢፎም ክመጹሉ ተረበጸ። “ሰላም ዝወደይ።” ኣብ ሓሳብ እንከሎ ብደገ ሓንቲ ሰበይቲ ክትደሃዮ ሰምዐ። መገዲ ኣርበዓታት ዘፋረቐት ወይዘሮ’ያ። “ሰላም ማማ!” ቬትሮ እታ መኪና ተራሕዩ ስለዝነበረ፡ ብዘይ ጸገም ክረ…